Renungan Panelas Warsa
Olih:
IDG Trinandita
 |
| Sumber Gagambaran: id.pinterest.com |
Nyabran sasih Désémber
pastika mejanten wargi sami jagi nyanggra warsa anyar. Warsa 2018 magentos
menados warsa anyar 2019. Magentos nyané warsa wantah pinaka bukti galahé
sampun memargi a warsa. Galah Désémber wantah galah panelas warsa 2018.
Pinanggal 20 Désémber wantah dina sané kasengguh Sugihan Jawa sinah iraga sami
patut niténin antuk mersihang sahananing sané wénten ring jaba angga. Minekadi
lingkungan utawi palemahan paumahan. Kasengguh panyucian buana agung. Raris
bénjangné pinanggal 21 Désémber kasengguh Rahinan Sugian Bali wantah galah
panyucian buana alit sané mapiteges galah nyuciang pikayunan nyanggra rahinan
jagat sané pacang rauh. Raris ring pinanggal 25 wénten Hari Natal sinarengan
ring penampahan Galungan. Galah krama Hindu nyalanang parikrama ngaryanang
olah-olahan pinaka sarana nyanggra Galungan. Raris tanggal 26 Désémber sampun
Galungan. Sinah akéh parikrama warginé sané kalaksanayang.
Warsa anyar lan rahinan
jagat sané mangkin dados asiki kasanggra warginé. Ngawinang akéh pidadab sané nyarengin
utawi ngikutin. Sekadi nyiagayang piranti nyanggra rahinan galungan lan
kuningan. Yadiastun Rahinan Kuningan wénten ring warsa 2019 sakéwanten patut
sampun kasayagayang saking mangkin midabdabin. Akéh pisan uparengga sané patut
dabdabin. Napi malih istri-istriné sampun sayaga antuk jejaitan, canang, hiasan
penjor ngantos basa-basa jagi anggén nyiapang lawar ring penampahan Galungan.
Lanang-lanang sampun nyiapang tiing penjor, hiasan pénjor taler sané tiosan.
Galungan wantah Pemargi
210 dina sané setata rauh ngawinang kramané sampun sayaga. Mapan rahinan jagat
galungan sampun kadulurin antuk rahinan-rahinan sadurung nyané sekadi Tumpek
Kandang, Tumpek Pangatag, Sugihan Jawa, Sugihan Bali, Penyajaan ngelantur
Penampahan lan Galungan. Punika taler selanturnyané. Ngantos kuningan lan
Pegatwakan. Sami pidadab puniki menados parikrama sané sampun kalaksanayang
warginé saking nguni. Minabta panglimbak jagat sané ngawinang wénten sané
mabinayan ring parikrama warginé nyanggra utawi nagingin parikrama inucap.
Yéning baosang warsa
anyar taler pateh sekadi punika. Nyabran 365 dina sinah sami warginé jagi
nyanggra sané mawasta warsa anyar. Warsa sané pastika lan patut kasanggra antuk
pidadab sané becik. Sané prasida ngawetuang rasa mulatsarira ring angga. Mulatsarira
sané ngawinang iraga sami prasida niténin kahuripan ring warsa sané jagi rauh
ngamolihang kabecikan sekadi pengapti warginé sami. Napi malih ring warsa anyar
sané jagi rauh wénten karya agung jagat sané patut kasanggra antuk pidadab
becik nyalanang swadarma negara sekadi Pemilu Législatif lan Pemilu Présiden.
Indik sané patut kalaksanayang warginé antuk rasa subakti ring panegara NKRI
puniki. Pinaka genah iraga masayuban menados warga negara.
Dadosné ritepengan
rahinan jagat sekadi mangkin patut pisan iraga sami mapinunas sumanggdané sami
pidadab lan parikrama inucp sida mamargi sekadi patut lan prasida ngamolihan
pemimpin bangsa sané dados pengapti sareng sami. Pengapti dumogi ngamolihang
wakil rakyat sané becik nyujur kerahayuan lan kasukertan rakyat sami. Punika
taler sumangdane prasida ngamolihan pemimpin bangsa sané prasida ngénter lan
nganter pemargin panegara nyujur sané mawasta kerta raharja gemah ripah loh
jinawi tan kirang pangan lan kinum. Tan kirang tongos masayuban lan sami kerta
raharja. Sinah sami pangapti kabecikan manados asiki ring pinunas wargine. Sami
pinunas sané becik kadasarin antuk rasa sutindih lan rasa pangubakti ring
kawéntenan jagat. Sinah sami punika patut kalimbakang ring angga. Dumogi sami
kabecikan prasida nampek ring kahuripan warginé sami.
20 Désémber 2018
wantah makarya dados guru. Dané ngajahin ring Klungkung. Seneng nyurat saking SMA sané kaanggén ring mading miwah koléksi pribadi. Kakawiannyané naanin kawedar ring Bali Post wiadin Pos Bali.
No comments