Mantan
Olih: I Gusti Lanang Sutéja Naréndra
Dadi jegég sajan tepuk jani? Pidan dugasé ajak biasa
dogén. Apaké ulian jani ia suba bisa mapayas? Ah, iluné masé suba biasa
tepuk ia mapayas. Apaké ulian ia suba ngelah modal anggo perawatan ka
salon? Ah pidan masé suba biasa tepuk ia ka salon. Lantas, apa
ngeranayang ia nyumingkin ngenah nyegégang?
Tumbén tepuk di pasisi pasihé. Dugasé ento tiang
majanji ajak Dik Stévy lakar matemu. Ah, pasisiné ento tongos
romantis lakar némbak Dik Stévy.Sakéwala buka pituduh widhi, tiang matemu
I Luh mantané. Sagét paningalané macaplagan ngajak I Luh, lantas pada pada
ngelingus mapi sing ningalin. Sakéwala ketug tangkahé sing nyidang mogbogin.
Patuh rasané buka matemu simalu. Adaaah...
Bancang rengkiang ané biasa gelut tiang ipidan, jani geluta
tekén anak lén. Mara tingalin telektekang, nyansan tekekanga. Celekotokané...
mara tawanga tiang pedidi, nyansan-nyansan I Luh, misi sélpi mapotrék
manying di arep tiangé. Kalud tunangané gedé welikas, yén bantas geles bisa
kepingseg tendasné!
Tiang bengong, katos magelekan buka ngelekang jaja klepet
nyangkét di klénéngan baongé. Prajani tiang kisik-kisik nyemak hapé mapi
nelpun.
"Halo sayang," kéto tiang ngeraos keras-keras
apang pirenga.
"Ya... Ya... Sabar sayang. Aku lagi di pantai.
Bentar lagi aku jemput. Muaach... Daaaadaaa yayang!" nyansan
ngerasang tiang ngeraos. I Luh makipekan, kéto masi anaké muani ané ajaka
(kurenané apa tunangané, sing nawang tiang). Mara mireng kéto, nyansan
manying I Luh. Jani misi nyelédoh lantas ngurik-ngurikin kumis anaké
muani ento.
Mimiih...ngerodok tangkahé, buka payuké di rirun tulukin
saang dapdap. Meluab sada andusné ngelikub!
Singké ia merasa angen tekén déwék tiangé ané sujatiné
tondén nyidayang mup on tekén ia. Sakéwala harga diri lelaki ngawinang tiang
pantang mengemis cinta! Bapan tiangé nuturin,
"Malikin mantan tan bina nyilapin utahan! Lebih baik
cari yang baru. Sebab yang baru selalu dirindu!"
Tuturé ento gemel tekekang tiang, mawanan alon-alon
tiang membuka hati untuk Dik Stevy.
Buiih, taanang tiang gedeg basangé. Daharin tiang pil
captopril abatu, apang tusing menek tensiné. Yéh Aqua abotol gedé
penékang ategakan. Dokteré ngorahang, air putih menétralkan tubuh.
Sinah nyak nétral gedeg basangé. Yén ulian ento tiang kanti
seteruk, ambat legan kenehné I Luh. Misinya sukses!
Hapé tiangé ngejer di kantongé. Ada WéA masuk. Nomer
sing tawang.
"kasian yang lagi sendiri," kéto raosné. Celekotokané,
pasti I Luh nénénan. Buiiih... Nyansan manes-manesin ia.
"Mau aku temenin?" buin chat-né masuk, misi
emoji gambar paningalan jantung barak makeplos.
Béh, telah kesabaran tiangé. Lantas émosi tiang
ngetul hapé nulis kéné,
"Icang sing peduli tekén Nyai! Icang sing
ngerambang bangkén dongkang!" gerimutan basang tiangé, ngirim pesané
ento. Kanti cerah layar hapéné bakat celek. Sakéwala pamuput, yéh
paningalané ngembeng nagih mabéok. Apang tusing tepukina tiang menangis
bombay, kipekang tiang muané marep ka duri. Mara tiang marep ka
duri, ndas bedag... Sagét Dik Stévy majujuk, yéh paningalané membah cara
Tukad Buhuné blabar kapitu kaulu!
"Dik....Dik...." kéto tiang kabilbil raosé
megat-megat.
"Koné suba sing peduli? Koné sing ngerambang bangken
dongkang? Kau terlalu menyakitiku, Lik Yan!" Dik Stévy magedi ngajorjor
ngarenjit, buka godélé lekad kajeng, sing bakat bén ngepung.
Ditu di pasisi, I Luh sayan mesra....
(Macang
Rumah Cinta Seribu Jendela)
No comments