Puisi-puisi I Kadék Darsika Aryanta; Kuangan Seduk
 |
| Gagambaran Manik Sudra |
Jangkrik Kipa
Ngering di padang tegalé linggah
Sabilang wai ngering peteng lemah
Geruh, gilik, jangih kalintang luwih
Gigi renggah ngeruak galak
Nanging
Kipa
Batis ganjil tusing ngelah caling
Jangkrik kipa
Matundun gading marajah kresna
Matedung langit maalas tanah
Gering mangering belus meteduh
Kelingas kelingus meteduh belus
Jangkrik kipa
srayang sruyung majalan uyun-uyun
I kipa ilang rejeng semut pedidi
Kedék kingking mebo berek buka leklek
Sengklek ketujeng-tujeng
Ringkih mapineh sukeh keruh weruh
Jangkrik kipa
Sliwar-sliwer di padang gering
Joh sawat kadén belus buin makudus
Nanging majalan encog-encog magered dui geber.
Jangkrik kipa
Tulung iba
Kuangan Seduk
Jlémpah-jlémpoh rerod sing mabayu
Kembang lémlém masrudukan
Semu gulem tanpa bintang
Ngluntang lantung lemet
Yan suba seduk
Keneh lebih di tongos anaké kampih
Mapupul daya upaya ngengkebang semu.
Ringkih merintih saling silih
Makada cemer leteh
Yan suba seduk.....
Yan suba wareg...
Kembang girang bayuné oger
Laku Bangras payu tatas
Ngrejet pada sami pakenyung
Tusing mapineh
Nanging samian tusing pada...
Samian kuangan samian kesedukan
Ngeréka daya upaya mangda lebuh
Gangsaran tindak...
Kuangan seduk......
Nadak Sara
Kuncup sayu gulem rem-rem nutupin matan ai
Ngaba gerobak sabilang wai rikala nepi semilir
matan ai
Lelampahané lemuh ngéka daya ngelidin matan ai
Laksana gunung angob nindihin parisolah
kasunarin matan ai
Nadak sara
Saka besik madué prabéya
Pikobet kalintang akéh
Nulak karya nemu sengkala
Galah nemu kangin katutup warih nemu kauh..
Nadak sara
Ngalih yéh nénten polih
Ngalih api nénten polih
Ngalih angin nenten polih
Nadak sara
Éling ring raga
Éling ring manah
Éling sangkaning karya
Ngiring mulat sarira
No comments