Pésta Kesenian Bali Warsa 2018

Olih: IDG Trinandita

Potrekan I Nyoman Mahayasa

Pésta Kesenian Bali (PKB) warsa 2018 niki kakawitin ring rahina Saniscara pinanggal 23 Juni 2018. PKB sané kaping XL puniki kakawitin antuk pelepasan pawai PKB ring ajeng Monumén Perjuangan Rakyat Bali magenah ring Niti Mandala Renon Dénpasar sawetara galah 14.00 Wita.
Selanturnyané galah sawetara dauh 20.00 Wita, PKB jagi kebuka ring Panggung Terbuka Arda Candra Dénpasar. Selanturnyané jagi kasolahang séndratari kolosal "Kresna Duta" olih Institut Seni Indonesia (ISI) Dénpasar. Masyarakat Bali utamannyané taler masyarakat Indonésia miwah wisatawan Manca Negara sané risedek melancaran ring Bali sinah jagi polih galah abulan nyaksiang sekancan kesenian sané kacentokan lan kesolahang irika.
PKB sané sinarengan sareng libur sekolah niki mapidabdab becik ring penglimbak penonton utawi pengunjung PKB. Iriki menados genah para guru lan sisia punika taler masyarakat tiosan polih galah becik macecingak ngantenang seni duwén iraga krama Bali.
PKB yéning manahang wantah pidadab mabuat pisan pinaka genah ngalestariang tur ngelimbakang Seni tradisional Bali. Seni Tradisional Bali minekadi Drama Gong, Arja, Wayang Kulit, Prémbon, Topéng, Gambuh, Calonarang, Barong, lan sané lianan mangdané nénten sayan rered napi malih ngantos ical. Punika taler mangda nénten lémpas ring pakem sané sampun wénten. 
Pidadab PKB puniki pinaka galah ngrereh utawi nemuang bibit utawi calon-calon penerus seni tradisional inucap. Antuk makudang kudang acara sané kawéntenang sakadi Parada Drama Gong, Parade Arja, Parade Gong Kebyar, Parade Bondres lan sané siosan.
Ring PKB taler kawéntenang makudang-kudang lomba sekadi nyurat aksara Bali, lomba tari tradisional utawi klasik lan tari modérn tur makudang lomba tiosan. Cutetné sami kesenian sané wénten ring Bali jagi kacentokan irika sekadi bondrés, jangér, tabuh gong kebyar, séndratari, jogéd bumbung, tari lan musik, tari gandrung, topéng panca, prémbon inovatif, téater modérn, wayang bondrés miwah akéh sané tiosan. Rumasuk wénten sesolahan kesenian saking dura provinsi sekadi kesenian merupa tari lan musik khas Kalimantan Timur. 
Ring penguntat PKB jagi kelaksanayang pemétasan kolosal "Gugurnya Parikesit" olih SMK N 3 Sukawati Kabupatén Gianyar. Minaban samian sané jagi kawedar ring PKB 2018 patut sanggra tur tonton.
Mapan yéning baosang ring kahuripan puniki minaban nénten wénten jatma ring jagaté sané nénten seneng ring seni utawi kesenian.  Sinah sampun pastika cerik, kelih tua bajang pacang nyihnayang angga seneng utawi oneng ring sané mawasta kesenian. 
Seni punika wantah rasa i manusa. Seni punika sané mebuat ring kahuripan menados budaya. Punika mawinan seni lan budaya nénten prasida jagi kepasahang. 
Yéning maosang budaya, sinah budaya Bali sampun kaloktah ring jagaté, indiké puniki sampun majanten dados keaksi ring ramia wisatawané rauh ka Bali sangkaning ipun kedaut jagi nyaksiang kesenian lan kebudayaan Baliné punika.
Pinih ungkur patut taler kawikanin ring parindikan téma PKB kaping XL puniki wantah "Téja Dharmaning Kauripan" yéning ring basa Indonésia kabaos "Api Spirit Penciptaan"
Tema puniki medaging tetuek sumangdané mersidayang nincapang lan numbuhang semangat wargi nyujur kasukertan lan numbuhang daya kréatif, inovatif lan nincapang kawicaksanaan warginé nyanggra sekancan pikobet-pikobet sané nibénin kauripané ring jagaté.

Buda, 13 Juni 2018


I Déwa Gedé Trinandita
wantah makarya dados guru. Dané ngajahin ring Klungkung. Seneng nyurat saking SMA sané kaanggén ring mading miwah koléksi pribadi. Kakawiannyané naanin kawedar ring Bali Post wiadin Pos Bali.

No comments