Panglimbak Médsos

Olih: IDG Trinandita

Potrekan Supartika

Yéning tlektekang ring aab jagaté sakadi mangkin, sinah nénten jagi prasida nambakin kemajuan Ilmu Pengetahuan lan Téknologi (IPTEK) sané sampun kejantenang.

IPTEK punika sampun ngelimbak nguasa sekancan parikrama kauripan jatmané sakadi mangkin.

Yéning baosang ring kauripan puniki. Pinih kapertama baosang ring jumah, jero, puri utawi griya soang soang sinah téknologi sampun ngaraksa utawi nguasa kauripan i manusa saking wau matangi.

Kapertama yéning wau matangi nikaang akéhang jatmané sekadi mangkin sampun ngawigunayang téknologi minekadi télevisi, pemanas toya, mesin cuci, setrika listrik, penanak nasi, AC lan sané tiosan

Indiké punika sampun karasa sakéng dumun duk listrik sampun masuk désa. Sajabaning ngawit metangi minabté nyantos rauh galahé sirep téknologi punika kari ngebekin utawi nguasa nguasi kahuripan imanusa.

Yéning sané sampun kawedar ring ajeng boya ja pelih utawi singsal punika wantah ciri kahuripan i manusa sampun nyangsan maju utawi ngamecikan. Nika sané kebaos nginutin kemajuan jaman.

Napi mawinan nénten dados baosang pelih utawi singsal, mapan sané wantah dados unteng ring sajeroning kahuripan silih sinunggil sinah sané mawasta kerahajengan lan kasukertan i manusa malarapan antuk ajah ajah luiré ajah ajah agama, budaya, politik, sosial, pertahanan, keamanan, hukum, Hak Asasi Manusia, lan sané tiosan. Ajah ajah Ilmu Pengetahuan lan Teknologi sané sanget kerasa pengaruhnyané ring widang sosial minekadi penglimbak médsos ring jagaté sakadi mangkin

Teknologi sané sampun ngelimbak puniki sané ngeranayang idup utawi kauripan i manusa ritatkala nyalanang swadarmannyané dados kerasa inganan utawi danganan, conto ipun sekadi sane sampun kewedar ring ajeng.

Yéning contohang malih pakewuh i manusa sané dumun ritatkala jagi maratengan utawi nyakan pastika patut ngaruruh saang utawi kayu bakar. Yéning mangkin sampun wénten gas élpiji, nénten malih makarya jalikan utawi cangkem paon sané pastika jagi ngawinan samian medaging aon utawi andus. Sané ngawinan paon utawi dapuré punika selem keni andus muah adeng.

Punika taler sané tiosan. Minekadi komputer sané sampun pastika ngawantu kahuripan imanusa. Yéning dumun makarya surat-surat sinah kantun nganggé mesin ketik sané mamunyi uyut taktik-taktik. Mangkin sampun canggih nganggé komputer utawi laptop lan sané tiosan. Komputer boya ja anggé ngetik kéwanten akéh parikrama lan pidadab i manusa sané kawantu olih komputeré punika.

Yéning baosang sinah sami punika mapidadab mangda i manusa ritatkala ngamargiang kahuripané nemu sané mawasta kasukertan lan karahajengan. Semaliha nemu sané mawasta kemudahan sané ngawinan danganan ngemargiang parikrama muah swadarma soang-soang.

Kecanggihan IPTEK (Ilmu Pengetahuan lan Téknologi) sinah sayan ngelimbak. Boya ja nganggén itungan minggu, bulan napi malih warsa sinah panglimbak kemajuanné punika wénten ring sajeroning menit utawi jam.  

Silih sinunggil kemajuan IPTEK punika wantah kemajuan ring MÉDSOS utawi média sosial pinaka conto sané panglimbaknyané becat utawi pesat wantah panglimbak HP. Yéning dumunan riwau medal HP punika wantah dados anggén nélpun sareng SMS kémanten, sané mangkin sayan ngelimbak. Sampun dados anggén magenepan. Yéning contohang, dados anggén internétan, mabalih TV, Vidéo Call, mebalih film/vidéo lan sané tiosan.

Sané patut dados uratian ring panglimbak médsos  wantah HP. Médsos yéning telatarang antuk basa saderana utawi awam wantah serana sané ngawinang pasemetonan, pasuwitran, prekanti, ngancan maweweh tur ngelimbak nénten mawates jarak lan dauh. Artin ipun hubungan i manusa sané wénten ring sejebag jagat sampun sekadi nampek yéning basa gaulné kasengguh globalisasi meartos tanpa wates jagaté sami dados asiki. Parikrama utawi budaya dura désa lan dura negara sané joh sinah dangan pisan kaaksi tur kacingak ring médiané punika sané ngarasuk ring parikrama wargané sami. Sami punika wénten marupa tulisan, gambar, vidéo lan sané tiosan. Média sosial punika yéning telatarang sakadi: Facebook, Liné, WhatsApp, Instagram, BBM, Youtube lan sané tiosan.

Panglimbak médsos puniki sampun dados peluang usaha mawinan nénten méweh jagi ngarereh konter HP utawi konter pulsa, mapan saking anak alit kari ngeranjing ring SD ngantos sané sampun lingsir, saking dagang canang ring peken ngantos dagang ring swalayan, saking petani ring carik ngantos pejabat tinggi sami nganggé HP punika.

Sané mangkin sané jagi unteng daging gaguwét puniki wantah midabdabin pengaruh IPTEK sané ngawetuang pengaruh médsos sané ngelimbak puniki. Inggih punika iraga manados manusa mangda nénten keni pengaruh sané nénten becik ulian kemajuané punika. Yéning cutetang, napi ja sané wénten ring aab jagaté sakadi mangkin, mangda kawigunayang ring tatujon nyujur kasukertan nyalanang urip mangda nénten ngawinang i manusa nemu sané mawasta sengkala tur kabyahparan.

Napi sané menados nemu sengkala, punika wantah yéning kemajuan IPTEK utawi MÉDSOS punika nénten kaanggé ring sekancan sané tan patut, conto ipun nguluk-nguluk utawi penipuan, penculikan, penodaan, lan akéh sané tiosan. Yéning iwang sinah ngawinang nemu sané mawasta tan rahayu.

Yéning tlatarang sinah pidadab becik tur kaon ring sajeroning pengaruh médsos pastika wénten. Sané becik minabta sampun kawedar ring ajeng, sané nénten becik minakadi, HP ngawinang manusané mangkin sibuk ring médsos kirang masadu ajeng sareng semetonnyané, manusané sekadi nénten rungu tur urati ring sakancan pola pali lingkungan lan pengaruh sané tan becik lianan

Yéning wénten pitakén napi sané ngawinan punika sinah ring aab jagaté sekadi mangkin nénten méweh ngarereh. Pinih ajeng yéning ngaruruh dampak utawi pengaruh médsos ring kahuripan sinah élah utawi aluh mapan ring internét punika sami wénten.

Nanging élingan rereh sané mapikenoh sekadi ring internet sané kagamel iriki sané mawasta HP. Iriki sampun wénten sané mawasta kemajuan sané patut anggé sekadi patut, mapan irika sampun wénten sané jagi ruruh. I manusa patut milih, milah raris minehin napi sané dados anggén tur napi sané patut ejoh entungang.

Kaping untat élingan sareng sami mautsaha mangda panglimbak médsos sampunang dados pikobet sakémaon mangda dados genah ngalimurang manah sungsut utawi sebet. Dumogi

Anggara, 22 Méi 2018

I Déwa Gedé Trinandita
wantah makarya dados guru. Dané ngajahin mata pelajaran matematika. Seneng nyurat saking SMA sané kaanggén ring mading miwah koléksi pribadi.