Puisi-puisi IDK Raka Kusuma; Pongah Juari

Gagambaran Manik Sudra

Pongah Juari, I

jeroné kama-mai

ngraos pongah juari

: guminé jani sayan melah

apa-apa dija-dija makenyah

tawang tiang

tetujon jeroné ngraos kéto

tawang tiang

apang ada nglosoin pamelin roko

tawang tiang

jeroné nyungjungang anak kuasa

tawang tiang

apang élah natakang lima

Pongah Juari, II

pongah jeroné!

juarin jeroné!

apang sayan melah?

paningalané dengéngang

cureng sekenang

liu brayané uyut

liu brayané makerah

ngranaang guminé benyut

ngranaang guminé benyah

saja patrambiah dini – ditu

wewangunan ngolét, liu

apa tekaanga? maling bani

sing takut mati

saja begeh rurung ngrédép aji hotmik

entasin motor maroda pat maroda dua

taén ningeh anaké pada pakrimik?

jani dija-dija

rurungé melah pasaja

nanging dadi paentasan buta kala

Pongah Juari, III

apané sayan melah?

apané sayan makenyah?

yén meled maan bati

barang adep. tanjaang kema-mai

da ngadep munyi tan pabukti

aji kemikan pongah juari!

sing dingeh raosé dija-dija?

da ngugu tukang ajum anak kuasa

kliengin yén tepuk

yén sing kéto, gepluk!

IDK Raka Kusuma
embas ring Getakan, Klungkung, 21 Novémber 1957. Dané nyurat makudang-kudang puisi mabasa Bali, satua bawak, esai basa Bali, miwah novélét mabasa Bali. Lianan ring punika, dané taler nyurat puisi, cerpén, lan ésai mabasa Indonésia. Kakawian-kakawian danéné sané mabasa Bali kawedar ring Bali Orti (Bali Post), Médiaswari (Pos Bali), Bali Aga, Jurnal Kawi, miwah Canang Sari. Lan kakawian dané sané mabasa Indonésia kawedar ring Bali Post, Nusa Tenggara, Karya Bakti, Warta Bali, Nafiri, Warta Hindu Dharma, Minggu Pagi, Kedaulatan Rakyat, Mimbar Indonésia, Suara Nusa, Pikiran Rakyat, Suara Karya, Sinar Harapan, Berita Buana, Républika, Singgalang, Analisa, Cak, Kolong, miwah Romansa.Ring warsa 2002 dané ngamolihang Sastra Rancagé antuk baktin ipun ring pangembangan sastra Bali malarapan antuk Majalah Buratwangi lan taler 2011 antuk kakawiannyané sane mamurda “Sang Lelana”. Ngamolihang Penghargaan Widya Pataka saking Gubernur Bali warsa 2012 antuk cakepané sané mamurda “Bégal”. Sareng pangawi saking Karangasem dané ngwangun sanggar sané mawasta Sanggar Buratwangi, lan dané taler dados silih sinunggil pangremba ring sanggaré punika.