Puisi-puisi IB Surya Matra; Semeng ring Pasisi Sanur

Potrekan I Putu Supartika


Semeng ring Pasisi Sanur

Galang kangin manundunin Gumanti nundunin kayun Nyliksik ati mangda metangi
Nyangra semeng ring pasisi sanur

I Bendéga ngencolang mulih
Wus ngruruh pangupa ri tengahing segara
Mulih makta pikolih
Tur kajantos I pianak somah

Toris-torisé sami suka
Gumanti nyaksiang suryané ngendih
Ring pasisi Sanur sané ramya
Luwih tan kakalih

Galang kangin manundunin Gumanti nundunin kayun Nyliksik ati mangda metangi
Nyangra semeng ring pasisi sanur

Maliang liang ring bias putih Maplalianan toyan segara Pasisi sanur wiakti luwih
Sampun Kaloktah ring dura negara



Dénpasar Mai Bareng Dini Negak

Dénpasar jak makejang mai bareng dini negak
Bareng macingklak ngadungang manah lan ati pakriak
Saguluk sagilik salantur titi minehin kahanané jani
Tolih ja ditu hotél né manyujuh langit Iwasin ja ditu torisé né melalung légod Mimih déwa ratu ……!!!

Dénpasar jak makejang, mai dini negak
Bareng makejang ngadungang basang lantang
Lan manah galang pang sami pada, pang sami trepta
Ilangang sangsaya, tong ja itungang
Nyapa tamyu, apa ké mendak I Ratu né malunan???

Dénpasar jak makejang, mai dini negak
Bareng ngadungang rasa lan arsa
Apang guminé setata trepta, inget tekéning swadharma Pinehin ja malu, guminé linggah suba liu tusing gelah Uyak vila lan umah méwah

Dénpasar jak makejang mai bareng dini negak Bareng maitungan ngadungang jalan né galang Truna bajang nak saja mabaju adat
Nanging apa ké seken ulati tekén jagat??? Para pejabat liu ngortaang indik budaya Apaké sujati sing madasar ulian daya???

Dénpasar jak makejang mai bareng dini negak
Bareng macingklak ngadungang manah lan ati pakriak
Bareng ngadungang rasa lan arsa
Lan manah né galang pang sami pada, pang sami trepta
Mangda Dénpasar nénten manadados pasardeen



Semeng Ring Kota Dénpasar

Magriung magrudug uyut Sepéda lan motor pati brayut Yéning suba jalan mamargi Tegarang ja dedeh ring ati Saling singguk sampun biasa Saling malunin nak mula karasa Murid murid melaib ngedirit Dagang dagangé saling pejerit
Semeng ring kota dénpasar

NB: Puisi-puisi puniki kaambil saking cakepan Dénpasar lan Don Pasar, kaca kaping 66


Ida Bagus Surya Matra Atmaja
Alumni Jurusan Sastra Bali UNUD puniki embas ring Sibetan, Bebandem Karangasem, 13 April 1986. Né mangkin sampun dados guru basa Bali ring SMPN 4 Tegallalang. Seneng ring sastra sampun saking SMA utaminnyané téater, nika mawinan ring warsa 2003-2004 dados ketua téater Kertas SMA 1 Amlapura. Daweg ngranjing ring Fakultas Sastra taler sareng aktif ring Téater Poerbatjaraka (dados ketua 2006-2007). Ring warsa 2005. sareng téater Raka Rai pentas mewakili Bali ring Taman Ismail Marsuki.

No comments