Lawat-Lawat; Ilang Tan Sakéng Lupa

Olih: IGA Darma Putra

Gagambaran Mank Sudra

Akéh margi sané sampun lintangin, ngawit saking wawu embas kantos mangkin. Wénten margi maaspal, wénten margi mabeton, wénten margi tanah, wénten margi buk, wénten margi endut, miwah margi-margi sané tiosan. Sami marginé punika neket ring manah soang-soang. Yéning sampun neket maka sami sané naenin entasin, méweh pisan ngengsapang.
Manut para guru sané sampun naening ngentasin marginé punika, kocap mrasidayang ngicalang élingé ring maka sami marginé inucap. Mangda mrasidayang ngengsapang, patut malih mamargi. Margi ngengsapang sané sampun élingin, kabaos margi engsap. Sampunang krunané punika kaaduk, raris kabadingin, dados engsap margi. Matiosan suksman krunané.
Ida Bhagawan Wreaspati, wikan pisan maosang indik margi-margi sané neket punika. Kaimbayang sakadi jun sané kanggén genah cuka. Yéning ambunin, juné sinah mambu cuka. Pradé mapikayunan jagi ngicalang ambun cukané, mangda kaicalang dumun daging juné. Maka sami cukané briokang. Wusan punika, mangkin malih ambunin juné sané sampun nénten madaging cuka. Kocap kantun ambun cukané neket ring juné.
Méweh sayuakti ngicalang ambun cuka sané sampun kadung neket. Sapunapi antuk ngicalang? Malih rerehang toya kanggén mresihin juné. Sikatin, sabunin, jemuhin. Mangda sumeken bresih juné, becik-becikang mresihin. Malih ambun-ambunin. Pradé ical ambun cukané, neket irika ambun sabuné. Ambuné miik ngalub. Sané rereh nénten ambun sabun, wantah ambun jun. Yéning dados, mangda nénten malih maambu. Yadian ambun cuka, sabun miwah jun. Ambun cuka utawi ambun sabun, pateh-pateh neket. Luas bojog teka lutung.
Kadi sapunika pratiwimba sané kaicen olih Ida Bhagawan, indik jun kadagingin cuka. Jun maka miwah cuka punika wantah saluiring margi sané sampun neket. Ngutang cuka, wantah ngutang sané naenin entasin. Napi sané naenin entasin? Embas maka miwah maurip. Sakéwanten arang pisan anaké éling, sapunapi sadawege embas? Dina, wuku, sasih, maka miwah ring warsa napi. Sasampuné duur, sasampuné kelih, raris wénten sané maosang, dedinan sadawegé embas. Kantos urip panca wara, sapta wara taler kabaosang.
Yéning wénten anaké embas miwah maurip, kabaos punika margi ngingetang, margi ngélingang. Sampu sué pisan mamargi ngéling-élingang, kabénjangang manut Ida Bhagawan Wreaspati, patut taler mabalik. Nuluh margi ngengsap-engsapang. Margi mabalik utawi mabading puniki, kabaos margi nyungsang. Nyungsang mateges mabading, utawi nungkalik.
Sasampuné nuluh margi mabalik, sampunang malih mabalik kuri. Margi mabalik puniki, kabaos margi tan pabalikan. Kocap kénten, manut Ida para sujana miwah yogiswara. Kénten kocap, kadi baos guru-guru.
Sakariné maurip, kocap wantah ngélingang sakaluir sané polih entasin. Margi ngélingin, sapisanan mamargi ngengsapang kasujatian. Terus kadi asapunika, wénten élingin, wénten engsapang. Wénten engsapang, wénten élingin. Imbayang kadi panak tabuan sané mabading ring umah ipuné. Sirahné ring sor, ikutné baduur. Yéning mangkin mamargi ngengsapang, napi sané kantun élingin? Sami sané élingin ical, sakéwanten nénten sangkaning lali utawi engsap. Sangkaning napi punika kantos engsapang? Sangkaning sampun matemu ring sang sané pisaratang.

IGA Darma Putra
embas lan magenah ring Bangli. Kakawiannyané kawedar ring makudang-kudang média, minakadi Bali Post, Pos Bali, Tatkala.co, Suara Saking Bali, miwah sané lianan.

1 comment:

  1. Kenapa Mesti Mendaftar Di V9Poker ?
    karna di V9Poker sedang ada Bonus SUPER GILA!
    -Bonus Deposit New Member 150,000
    -Bonus Next Deposit 10%
    -Bonus Referral 20%
    Dan yang tak ketinggalan V9Poker menerima deposit via pulsa loh!
    V9Poker Menerima Deposit Via GO-PAY

    BBM : D8A8E2BC
    wa : 0823 6701 2535
    LINE : V9POKER

    pokerv99
    deposit via Go-Pay
    deposit via pulsa
    judi uang asli indonesia
    bonus turnover terbesar
    situs judi online terpercaya
    uang asli indonesia
    uang asli indonesia
    bonus referral terbesar
    poker depo pulsa
    capsa depo pulsa
    ceme depo pulsa
    domino depo pulsa
    deposit via telkomsel
    deposit via xl

    ReplyDelete