Lawat-lawat: Sara Kusuma

Olih: IGA Darma Putra

Potrekan Manik Sudra

Bhatara Shiwa nedeng ngelarang tapa ring gunung Mahaméru. Para dewatané sami osah pikayunané santukan swargané jagi kagebug olih raksasa wadwan Nilarudraka. Nénten wénten sané mrasidayang ngasorang raksasané punika, s­­ajawaning okan Ida Bhatara Shiwa. Raris metu pikayunan para déwatané mangda Ida kayun ngalebar tapa tur matemu sareng praméswarinida.
Sang Hyang Smara polih amongan mangda mrasidayang nangiang Ida Bhatara Shiwa saking tapanidané. Sakéwanten sinah nénten mapikolih pabuaté kadi sapunika, santukan Ida Bhatara Shiwa wantah déwan jagat. Sakéwanten Sang Hyang Smara, nénten urung rauh turmaning sampun masangu sanjata utama. Sara Kusuma.
Kadi asapunika kawéntenan Sang Hyang Smara ri tatkala jagi mautsaha ngalebar tapanida Bhatara Shiwa. Wénten sanjata sané dados gagambelan Sang Hyang Smara inggih punika Sara Kusuma. Sara mateges astra utawi panah. Kusuma mateges sekar utawi bunga. Sara punika panah marupa bunga. Awinan patut tiaga, pradé wénten anak micayang sekar. Jerihin sekar punika wantah sanjata kanggén ngoda tapa brata.
Antuk panah bunga inucap Ida Bhatara Shiwa mrasidayang katangiang. Sakéwanten, anggan Sang Hyang Smara geseng. Kageseng olih gni sané embas saking nétranida Bhatara Shiwa. Piwelas asih Ida Bhatara Shiwa, saking pinunas praméswarinida, raris kasupat malih. Sang Hyang Smara prasida murip, sakéwanten tan pangga. Raris Sang Hyang Smara kawastanin Anangga, mateges nénten madué angga.
Pradé wénten anak sané nénten madué angga, déréng majanten nénten maurip, santukan dados ngaranjing ring anggan anak tiosan. Sakéwanten patut pisan mangda polih wara nugraha saking Ida Bhatara Shiwa riin. Sapunapi pamarginé mangda polih wara nugraha kadi sapunika?
Ring Kakawin Smaradahana sampun kasinahang, wantah sangkan pinunas praméswarinida Bhatara Shiwa inggih punika Bhatari Uma. Bhatari Uma wantah shaktinida Bhatara Shiwa. Awinan pradé mapikayun dados Anangga, kapatutang nampekin Bhatari Uma. Utawi nampek sareng shakti.
Napi anggén nampekang déwék sareng shakti? Manut Mpu Dharmaja sané ngardi kakawin Smaradahana, wantah bhakti. Sang Hyang Smara sangkan bhakti ring Bhatara Indra, raris ngamargiang swadharma. Déwi Ratih sangkan bhakti, mapinunas mangda kapica nénten madué angga sarira. Sangkan bhakti, Smara-Ratih polih waranugraha. Napi wastan waranugrahan Ida Bhatara Shiwa? Waranugraha punika kawastanin asih.
Sang sané bhakti, kapicayang asih olih Ida sané kabhaktinin. Kadi asapunika kawéntenan Sang Hyang smara sareng Bhatara Shiwa. Sira punika Sang Hyang Smara? Manut katattwannyané, Sang Hyang Smara taler mapeséngan Sang Hyang Kama. Kama punika embas saking anggan Ida Bhatara Shiwa. Awinan Ida Bhatara Shiwa taler mabiséka Mahakama, utawi Kaméswara. Kama ring angga sarira wénten kalih. Kama Bang ring anak istri, Kama petak utawi putih ring anak lanang. Bang punika RAtih, petak punika SmaRA. Maka kalih madaging RA. RA wantah wijaksara sané malinggih ring Rah. Kadi raos guyu-guyu, dados gega dados nénten.
Sang Hyang Smara antuk panah bunga, nangiang Ida Bhatara Shiwa. Kadi sané kasinahang ring Smaradahana, Sang Hyang Smara sampun ngaranjing ring anggan sang maraga lanang. Déwi Ratih ring anggan sang maraga istri. Mangkin patut takénang, ring dija patut rereh Ida Bhatara Shiwa sané kantun matapa? Anggén napi ngarereh Ida Bhatara Shiwa? Minab tetujoné wantah mangda kayun Ida ngembasang oka. Napi anggén nangiang Ida Bhatara Shiwa? Manut caritané sané sampun lumbrah wantah panah bunga.
Ring dija rereh panah bungané inucap?
Wénten baos kadi sapuniki. Bunga punika wantah sekar. Sekar kocap mapakilitan sareng sekah. Sekah punika lawatan angga sang sané sampun lebar. Ketah kanggén ritatkala wénten upacara pitra yadnya, kadi sané kamargiang olih anaké sareng akéh. Cutetnyané, sekar punika angga sarira. Minab punika sané ngawinang, yéning wénten anak lebar kabaos kalayu sekaran. Sarirané kawastané layuan [layon]. Angga sarirané kocap layu. Napi awinan layu? Santukan nénten malih madaging bayu.
Bayu punika prana, utawi angkihan ring basa lumbrah. Anak sané sampun lebar nénten malih mangkihan. Yéning nénten mangkihan, sinah papusuhan utawi jantung nénten malih ngetug. Papusuhan nénten ngetug, nénten wénten rah sané malingsé ring angga sarira. Rah punika sayan sué, sayan padat. Sayan padat sayan dingin. Rah sané dingin ngawinang sarirané taler dingin. Layon sang sané sampun lebar, sinah dingin. Nénten wénten malih rah mamargi ring uat utawi sarira.
Yéning angga sarira punika sekar, panah sekar Sang Hyang Smara punika napi? (*)


IGA Darma Putra
embas lan magenah ring Bangli. Kakawiannyané kawedar ring makudang-kudang média, minakadi Bali Post, Pos Bali, Tatkala.co, Suara Saking Bali, miwah sané lianan.

No comments