Baliho
Olih:
I Gusti Lanang Sutéja Naréndra
 |
| Gagambaran Olih Beluluk |
“Mbééé... gambar
apa ento Bli? Ber sabilang atindak icang nepukin potrékan anak makenyem,” ber
jeek pesaja I Luh kurenan tiangé nepukin balihoné majéjér di margané nuju ka
kota. Lakar pilkada, paberarak gambar caloné ngabekin marga. Beh, saja kapah
bakat ajak ia mlali ka kota, mawanan kawéan nepukin kakéto. Tuléngéka gambar
balihoné, kanti ngemasin nyelé ati, pengeng mamontoran.
“Apa ento?
Jeg saru saruna awaké mapeta!” buin ia nyesedang, berangti sambila kecuh kecuh,
mencer poosné ulian lengeh mamontoran.
“Ooo...ento
anak metanja,” kéto tiang nyautin sambilang mukak kaca jendélan montoré.
Tatujoné apang I Luh maan angin, boyanan nyelé atiné.
“Mbééé...matanja?
Apa tanjaanga? Dooong...dagang ento Bli?” enu masé ia jeek, sambila nguyakin
cunguhné minyak angin.
“Nah, mesaih
tekén dagang. Nak nanjaang déwékné ento!” Sautin tiang bawak, sambilang
ngenjuhang krésék, nyén nawang I Luh ngutah. Pang laut di kréséké ia ngutah.
Lek atiné tekén Pak Supir, mauraban misi utahan montorné.
“Aiihhh...mudah
idepan anaké ento. Masak déwéké tanjaang.” I Luh makecuh, poosné ganting. Buin
ia ngeraos, “Metanja apang kénkén ia Bli?”
“Nak ia
medagang janji. Déwékné tanjaanga, apang nyak ida danéné milih,” milu tiang nyemak
minyak angin, magejulan ulun atiné ningalin poosné I Luh maléntéd.
“Mbééé...
mudah pesaja,” I Luh ngarenggeng.
“Yééé...
Nyai sing nawang. Dikénkéné bisa Ida danéné banga pipis, apang nyak ugi milih,”
jani utahan tiangé suba nganjel di kolongan. Léngkongé, bareng tiang nyélé
ati.
“Dagang apa
kakéto? Nyak ia mabati yén kéto carané medagang?” matakon I Luh sada paningalané
kijem, minyak anginé ngawinang paningalané ngaap.
“Béh, Nyai
sing ngerti. Jani nak bani ia mamocol, batiné jemaka kayangé suba mapilih.
Mawinan melahang milih, apang eda iraga milih pemimpin ané nyaratang bati!”
sautin tiang I Luh sambilang nyelélég di tegakan montoré. Nyélé atiné sayan
sayan.
“Apang kénkén
matanja nganggo plakat lumbang kakéto, Bli?” mimiih... Nyansan nyényé I Luh metakon,
sing tawanga tiang suba nyelé ati, pesu peluhé matah matah.
Laut sautin
tiang ia sambilang ngidem. “Baliho adané ento. Nyai, plakat maorahang! Apang énggalan
tawanga tekén ida danéné. Sing tuyuh nekain besik besik. Buka Nyai jani,
sambilan liwat tepukin Nyai gambarné, sida lantas Nyai nawang anaké ento!”
“Mimiih... luung
carané anaké ento matanja. Mani kayangé mulih icang lakar ngaé masé baliho kakéto.
Isinin potrékan icangé nganjali. Mapusung tagel, makebaya prancis. LUH SAPLAG,
JUAL SALAK GULA PASIR ASLI SIBETAN! kéto lakar isinin tulisané. Pasang bilang
pempatan nah, Bli!”
Tiang sing sida nyautin, utahané suba tambis pesu. Sagét I Luh gagésonan mukak
krésékné laut ngutah bayar. Celekotokané...kréséké bolong, utahané mabiok di
pabinané. Sedek I Luh enu blekuk blekuk, ada anak nakonin uli duri, “mimiiih...
napi mawinan ibu mangsul, Bu?”
I Luh masaut
sambilanga ngemkem utahan, “tiang seneb nyelé ati ulian nyeréré potrékan
anaké ané di balihoné niké!” kéto I Luh matujuhan ka baliho di lampu mérahé ané
nyelélég ampehang angin.
Anaké ané
matakon bareng nyeréré, ngenah potrékan anak makenyem. Saget ia bareng
mablekuk...
“Uuuééékkkkkk.....”
(Macang Rumah Cinta Seribu Jendela)
No comments