Puisi-puisi I Wayan Tojan; Yadnya Utama


Potrekan IGA Darma Putra

Yadnya Utama

tanah pasih
entik-entikan
saisin Gumi
sami pakardin Widhi
sami wantah duwén widhi
napi malih aturang
yén rasayang tiang
yadnya pinih utama
wantah parisolah sané becik
pikayun sané luwih
turmaning welas asih
pastika rahayu kapanggih
....


  
Tutur I Bapa

Jani bapa nuturin cening
Apang pada tatas uning
Yadiastun lekad mabekel eling
Entasin lampah hidupé cening
Madasar keneh hening
Aget lacur adung masanding
Jani kedék mani bisa ngeling
Sebeté saruang  magending
Bagia ada tuah di keneh
Melah-melah ngaba papineh
Kén pelih kén beneh
Dasarin ban Keneh.
Keneh ané beneh
Beneh ban mapineh.
Pang sing nyakit keneh
Da sanget ngugu tutur di sisi
Cara jani perlu masi koréksi
Saru puyung tekén misi
Da jeg nyalanang emosi
Pang tusing nyesel siduri
Né tutur bapané gisi
Anggon bekel ngaliwatin wai
Ané luung duduk gisi
Ané jelék entungan ka sisi
....



Indik Unduk

liu nawang indik
kéwala sing maunduk
wiréh gangsaran tindak
cara kuping ngaliwatin tanduk
keneh gedé bayu enduk
kema mai tundak tundik
sulur idep
sulur idup
apang melah
apang élah
nuluh lampah urip
salantang tuwuh
apang landuh



Masawitra

solah laksanané apang melah,
manyama braya apang élah
anggon bekel saenu di lemah
masawitra apang asih,
saling asah saling asuh,
sing dadi saling pisuh
matimpal saling tulung
ditu lakar nemu luung.
sawitra satmaka kasugihan



Segara Nyuhjuh Giri


segara ring pasisi
genah malasti
segara lan giri
pinaka lingga yoni
genah sané suci
sané mangkin segara ring pasisi
anyud plaibang abrasi
toya maluab ka pesisi
mamargi nyuhjuh giri
segara giri ring bali
mangda ajeg sutrepti



I Wayan Tojan
Embas ring Désa Ngis, Kecamatan Manggis, Karangasem pinanggal 13 Juni 1982. Kakawianipuné kawedar ring Bali Post (Bali Orti) miwah Pos Bali (Médiaswari).

No comments