Nyanggra Warsa Anyar

Olih: Madé Suar-Timuhun

Potrekan olih Supartika

Galahé terus mamargi, lemah wengi lemah wengi, tan prasida malih mawali. Tan karasa awarsa sampun kalintangin antuk ngmargiang karma nganutin swadarma soang-soang manados manusa. Napi malih i raga sané dados krama Hindu ring Bali, siosan makarya ngrereh pangupa jiwa, pastika taler ngmargiang adat lan budaya, nglaksanayang upacara yadnya. Yadiastun kadirasa nyabran rahina wénten upacara yadnya, nanging maka sami punika sampun prasida antar kamargiang tur labda karya sidaning don.

Warsa duang tali pitulas puniki manawi pacang dados sejarah duaning Giri Agungé mawali makudus sakadi duk warsa siu sangangatus nem dasa tiga. Sering wénten lindu magejeran, pinih ageng karasayang ring wewidangan Karangasem lan Klungkung. Giri Agungé punika érupsi kantos status awas sané ngawinang sameton ring Karangasem akéh mangungsi. Sané pinih akéh ngungsi ka Klungkung. Sangkaning bencana sané nibénin punika, prasida nudut kayun krama Bali muah dura Bali ngwantu ngicénin bahan pangan miwan sandang majeng sametoné sané ngungsi punika, taler akéh sané lascarya manados rélawan. Pemerintah pastika taler sampun sareng ngicénin wantuan, napi malih Présidén iraga kantos rauh ka Bali, ka genah pangungsian, nyingakin langsung krama sané keni bencana punika. Punika pinaka cihna rasa uratian sané ageng saking pemerintah lan kramané sami. Pastika sungsut pisan pikayunan sameton iraga sané keni bencana punika, dumogi ja érupsi Giri Agungé gelis puput, tan wénten sabeh aon malih.

Érupsi Giri Agungé puniki nyabran wai kabligbagang ring média massa lan éléktronik. Napi malih ring média sosial. Sangkaning érupsiné punika akéh wénten krama sané ngaku wikan, ngaku polih pawisik saking Giri Agung kantos katakson utawi karauhan. Wénten taler krama dura Bali sané ngaku dados juru kunci Giri Agungé punika, raganné kocap sané nganikain Giri Agungé mangda maletus. Raganné prasida nyetop utawi nganonaktifang Giri Agungé yéning Gubernur Baliné sané rauh mapinunas langsung sareng raganné. Indiké punika ngawinang akéh krama Baliné ring média sosial mamanes sané ngametuang akéh panampén. Tan akidik sané nantang mangda kayun ngadu kasaktian, mangda muktiang raosné punika. Napi ja punika, samian wantah daging pertiwi, isin gumi, iraga patut prasida nyelehin sané becik lan patut. Rta Buana sakadi Giri maletus tan prasida katambakin. Iraga wantah prasida ngrastiti, nunas ica majeng ring Ida Sang Hyang Widhi mangda kaicén kaslametan, tan wénten kramané sané keni letusanné punika.

Mangkin sampun panguntat warsa, pastika kantos warsa sané rauh bencana érupsi giriné puniki pacang kantun kabligbagang. Sarahina sadurung warsa anyar, pastika kramané pacang makarya acara nyanggra warsa anyar. Kawéntenan jagat Baliné sakadi mangkin, napi tetep kadi warsa sané lintang, maliang-liang ngenyit kembang api, mapésta nginem bir, arak, utawi tuak? Sakémaon sametoné ring Karangasem kayunnyané kari sungsut, kari takut, sangsaya pét pradé Giri Agungé maletus malih.

Suang-suang krama pastika madué kasenengan sané mabinayan napi malih ring dina panguntat warsa. Liang duaning sampun prasida nglintangin warsane puniki, bagia duaning pacang ngmarginin warsa anyar. Napi ja sané jagi kalaksanayang, dumogi ja tan kantos ngawi biuta. Manyama braya ring Bali mangda tetep adung, sagalak-sagilik, salunglung sabayantaka sarpanaya. Yéning madué jinah lebih becikan sampunang anggéna numbas sané boya-boya. Katimbang jinahé dados ineman alkohol sané ngametuang utah, utawi kembang api sané katunjel dados aon, becikan anggén ngwantu sametoné sané keni bencana ring Karangasem. Nanging sayuakti, kayun iraga pada mabina, maliang-liang awarsa apisan tan ja dados pikobet sané mabuat. Ngiring nyisik bulu mangda warsa sané pacang rauh sayan ngamecikang. Darma agamané tetep anggén sundih ngmargiang swadarma. Ngiring ngrastiti bakti mangda jagaté landuh, gemah ripah loh jinawi, sutrepti jagat lan sadagingnyané. Napi malih warsa sané jagi rauh pacang kawéntenang PILKADA, dumogi sami mamargi becik, antar, sutrepti, tur ngmolihang Pamimpin Bali sane becik. 

Swasti nyanggra warsa anyar sameton sareng sami.

Madé Suar-Timuhun
I Madé Suartana utawi sané ketah kauningin Madé Suar-Timuhun ring kakawian-kakawiannyané embas ring Banjar Tengah, Timuhun, Klungkung, 17 Juni 1987. Dané ngawit nyurat sastra Bali modéren rikala kantun kuliah lan aktif nyurat warsa 2013. Puisinnyané ngawit kawedar ring Bali Orti (Bali Post) bulan April warsa 2013 lan warsa 2014 sampun kawedar ring Médiaswari (Pos Bali). Dados narawakia ring Ubud Writers and Reader Festival 2016.