Tomplok Tiang Listrik, I Lecir Ngelapur ka Polisi
Olih:
I Putu Supartika
Ulian tomplok tiang
listrik lan ngaénang sirahné kanti bencol lamun bakpaoné, semengan I Lecir suba
uyut.
“Tiang listrik
bangsat!!! Tusing bisa minggir. Suba tawanga awaké mentas, Dija pejanga matané.
Sing ngelah otak!”
Kurenané ané mersihin
bencolné aji lap misi yéh anget lantas mamunyi.
“Adi tiang listriké
pelihang bli. Bli ané belog mejalan. Suba tawang tiang listrik to nguda tabrak?
Kelidin naké.”
“Nguda bli pelihang
nyai? Né tingalin sirah bliné kanti bencol lamun bakpaoné, sing pedalem nyai?
Nyai malahan mélanin tiang listriké. Nyai lebih sayang tekén bli apa tiang
listriké?”
“Yéh kénkén keneh bliné
mamunyi kéto?”
Kurenané lantas
nagelang lapné ané misi yéh anget totonan lantas magedi ngalahin I Lecir sambil
mamunyi.
“Ibaiban ngubadin
bencolé. Sing maan ngurusang bli.”
“Nyai lakar kija?”
“Lakar sik tiang
listriké. Tiang lebih milih tiang listriké ketimbang bli.”
I Lecir malengos,
sambilanga nyemak lapé totonan. Baan gedeg basangné, ia lantas mamunyi: Né
makejang gara-gara tiang listriké totonan! Awas!
***
Tengainé, I Lecir sagétan suba di kantor polisi.
“Wénten napi Pak?” kéto polisiné nakonin I Lecir di ruangan kantor
polisiné.
“Tiang tabrakan tunyén. Tiang jagi ngelaporang indiké nika. Niki
buktiné sirah tiangé bencol lamun bakpaoné.”
“Mih, saja bencol Pak. Sareng
sira bapak metabrakan? Dados kantos bencol kénten.”
“Tiang listrik pak.”
Polisiné heran
ningehang munyiné I Lecir. Tiang listrik?
Adan jelema totonan? Kéto polisiné mamunyi di kenehné, sakéwala tusing
pesu.
“Ipidan kejadiané Pak?”
“Tuni semengan, dugasé
tiang olahraga Pak. Jeg gedeg basang tiangé. Pokokne ia harus dihukum berat
Pak. Bilaperlu penjara seumur hidup. Nika rumasatang percobaan pembunuhan!”
munyiné I Lecir nyansan negehang.
“Nggih pak alon-alon
dumun Pak. Sabar. Tiang pacang bertindak sesuai prosedur sané berlaku Pak.
“Yén menurut bapak,
kira-kira kuda umur sané ajak bapak metabrakan Pak?”
“Kuang lebih limang
tiban pak.”
“Limang tiban? Ten kari
dibawah umur nika Pak?”
“Seinget tiangé tiang
listriké nika sampun limang tiban mejujuk drika. Tiang inget pesan Pak.”
Polisiné héran.
“Tiang listrik niki
adan jelema nggih Pak?”
“Badah, bapak ten
nawang tiang listrik. Mih déwa ratu! Tiang listrik sané mejujuk di sisin jalané
nika Pak.”
“Bapak meriki
ngelaporang tiang listrik kénten?”
“Nggih! Pokokné tiang
dot tiang listriké nika kena hukuman berat. Seberat-beratné. Nika percobaan
pembunuhan! Untung tiang ten gegar otak, utawi ilang ingatan. Untung tiang ten
mati. Untung tiang cuma bencol dogén Pak.”
Polisiné kituk-kituk
dogén. Sing ngerti tekén kenehné I Lecir.
“Pokokné, kasusé niki
harus diusut kanti tuntas Pak, tur secepetné.”
Polisiné lantas
nyekenang.
“Sapunapi kronologiné
Pak?”
“Semengan, dugasé tiang
olahraga, tiang melaib di trotoaré. Iseng tiang makipekan sawiréh wénten anak
bajang ngaliwat. Yéh tau-tauné jeg wénten tiang listrik dimalun tiangé, lan tiang
listriké nika nabrak tiang. Untung tiang ten terlalu cepet melaib. Sakéwala
tiang ten ngerti Pak, suba tawanga tiang ngeliwat drika, to nguda tiang listriké
nika ten nyak minggir. Jeg ten ngelah otak. Dija kadén pejanga matané. Ulian
nika, tiang curiga wénten unsur kesengajaan, tiang marasa wénten konspirasi di
balik semua niki. Percobaan pembunuhan. Mirib wénten sané ten demen ngajak
tiang lantas nyéwa tiang listriké nika apang ngematiang tiang. Apang bapak
nawang, mangkin kurenan tiangé megedi uling jumah Pak lan durung mulih. Minab
tiang listriké sané mlaibang kurenan tiangé. Tiang nunas, bapak menangani
masalahé niki secara tuntas. Bila perlu tiang listriké nika dihukum mati. Berat
kasusé niki. Gedeg gati basang tiangé.”
Ningehang munyiné I
Lecir, polisiné mablekis kedék.
“Mungkin nika kelalaian
Pak. Bapak lalai rikala mentas ring marginé. Sepatutné bapak lebih hati-hati
ring marginé.”
“Bapak ngilonin tiang
listriké? Jelas-jelas niki percobaan pembunuhan. Yén ten percobaan pembunuhan,
nguda sirah tiangé sané bencol, nguda ten batisé? Bapak mangda uning, sirah
niki organ vital Pak. Melukai oragan vital pateh tekén percobaan pembunuhan!”
“Kéné nggih Pak. Tiang
boya ja ngilonin tiang listriké nika. Tiang lakar memproses masalahé niki, sakéwanten
wénten syaratné Pak.”
“Napi syaratné Pak,
jagi laksanaang tiang.”
“Mangkin bapak tegarang
dumun préksaang ragan bapaké ka psikiater utawi RSJ Bangli nggih Pak.”
No comments