Puisi-puisi I Nyoman Buda Arimbawa; Sledét Dén Bukit

Gagambaran I Nyoman Buda Arimbawa

Sledét Dén Bukit

Uttaraning jagat bali pulina

Uleng pangaksiné ring genah wibuh

Wawidangan agung cihna digjaya

Maurip taksu nembang panjiprakasa

Mungkah surya ring adeg jagat landuh

Babarungan bukit lan segara ngurit carita

Subaganing gumi kajanaloka

Tatamian Sang Natha lintang suradira

Ngunggahang urip ring suécan segara

Nandur sarira ring paican sri sedana

Nglungsur rahayu ring unteng lintih wana

            Matunggal paramatattwa mapakraman

            Dén Bukit...

Sledét prawiraning taruna jaya

Prasangganing kebyar nambur jagat

Srenggaraning gita ngurip palawakya

Kakawian sang wreda lintang pradnyangga

Sasuratan yowana jaya prawikrama

Ngembasang biséka ring ungkur parwata

Dén Bukit...

Jelé Melah Gumi Gelah...

                                                            Kubutambahan,

Anggara Keliwon Tambir, 30 Méi  2017

Tembang Sekar Sandat

Rakwa sekar punika nembangang gending,

gending rasa kawates genah sané tios,

tios ring tatinggahan i kekupu,

bina ring ius adeg akah i waringin,

tur cenidra ring entik carang intaran...

Tembang ipun nyleseh peteng,

petengé rumasa mapitakut,

dingin mangampehang ipian,

ipian cihna rasa kalikub rindu,

rindu ring ketélan i damuh semeng...

Sumirit miyik ipun nembangang gending,

gending rasa tuna unadika,

lipia ring pageh i punyan dapdap,

singsal ring prarem i damar sentir,

tur tingkeb ring manis segara madu...

Tembang ipun las masunar,

nyangkepin galang i purnama,

petengé rumasa ngandika,

bintang-bintang arsa manyatua,

Wénten kalih angen sané ngunggah rindu...

Ring miyik ipun i sekar sandat... nyantos sapawali i kekupu

  

Selat Peken,

Redité Wagé Uyé, 18 Juni 2017

Tembang Sekar Sandat II

Riwusan wengi nelaratang ipian,

tembang i déwa kantun masuara

ring unteng manah sané nyilib,

minab damuhé manunggal pertiwi,

ring natar alit pacanggahan,

taler ring sarin ipun i sekar sandat,

manawi nyobiahang miyik pinaka wirasa,

pinaka cirén sapaninggal i kekupu,

ngindang ninggal ketélan sabeh,

sané nyampuhin sepi jeroning angen...

Risampun menga purwaning nur,

paras i déwa ngokasang lengkara,

ngasor lituayu Sang Nilotpala nedeng kembang,

kasarengin kenyung makéh suksma,

lan toyan panon sané nedunang lascarya,

macampuh tresna ring tungtung tangis i déwa...

Pamargin galah nénten sida kabasta,

sadurung sasihé manggih panglong,

tur sadurung gong panguntat masuara,

durus igumang daging tembang i déwa...

Wekas caritayang indik patemon puniki,

i kekupu matinggah ring linggih ipun i sekar sandat...

  

Kubutambahan,

Sukra Pon Perangbakat, 7 Juli 2017

I Nyoman Buda Arimbawa
Embas ring Selat Peken, Susut-Bangli, 21 Oktober 1998. Tamat saking SMA Negeri Bali Mandara warsa 2017.