Antuk Puisi Mapinunas Dumogi Gunung Agung Nénten Kroda

Potrekan Olih Nyoman Agus Sudipta

Ngawit dina soma tanggal 18 Séptémber 2017 jam 9 wengi (WITA), status Gunung Agung nincap, saking status waspada (lével II) dados siaga (lével III). Indiké punika ngawinang ramia pisan pabligbagan, ‘himbauan’, wiadin gatra indik Gunung Agung ring media sosial wiadin ring média cétak muah éléktronik. Nénten ja marupa gatra wiadin ‘himbauan’ kémanten, wénten taler sané makarya puisi ngenénin indik gunung agung. Puisi punika unteng nyané wantah mapinunas sumangdané Ida sané maraga kuasa ngicén karahayuan lan Gunung Agung nénten kroda. Niki wantah sinalih tunggil puisi kakawian saking I Ketut Aryawan Kenceng indik Gunung Agung.

Gunung Agung

Olih: I Ketut Aryawan Kenceng

Sampunang ja brangti duka

Kerag kerug ngembahang baya

Panjak damuh parajana malaib labuh

Rarud ngungsi runtag inguh

Rarianang dumun angabar abar angkarané

Mangda degdeg enduh jagat baliné

Lianan ring puisi punika, wénten taler puisi saking I Nyoman Agus Sudipta indik Gunung Agung, sakéwanten puisi punika durung madaging murda. Niki wantah puisi punika.

Sampunang dumun matangi 

Icénin malih titiang iriki ngaturang bhakti 

Degdegang dumun kroda ring tengahing ati

Mangda yukti rupa Agung mamurti yoga samadhi

Ajeg manunggal akasa lan pertiwi 

Puncaking jagadhita gumi Bali

Gunung Tohlangkir sira purun ugi

Mamanah sumbung piwal ring Parama Kawi

Jantos, pastika medal kroda marupa nalagni

Dumogi, malarapan antuk puisi puniki, jagaté utaminé sané wénten ring wilayah utawi keni ‘zona mérah’ Gunung Agung polih karahayuan.