Yén Bénjang Tiang dados Présidén

Cover Yen Benjang Tiang dados Presiden

Murdan Cakepan    : Yén Benjang Tiang dados Présidén

Pangawi                  : I Putu Supartika

Kawedar Antuk      : Pustaka Éksprési

Warsa                      : 2014

Tebel                       : v + 127 kaca

           Pupulan satua cutet “Yén Bénjang Tiang dados Présidén” wantah cakepan kapertama saking I Putu Supartika. Ring cakepané puniki madaging 20 satua cutet sané kakaryanin saking warsa 2013 kantos 2014. Akéhan satua cutet sané munggah ring cakepané puniki sampun naanin kawedar ring Bali Orti (Bali Post) lan Médiaswari (Pos Bali). Daging cakepané punika wantah: Swalapatra Majeng ring Sang sané Tresnain Titiang, Suryané Redup ri kala Séndéh Kawuh, Paris I’m Coming, Kutun Rurung, Ayu Ratih, Susus Kawales Tuba, Méong lan Bikul, Pekak Raka, Lawat Suwung, Buduh, Ngalih Bagia, Eda Ngadén Awak Bisa, 2014, 2014 (2), Caleg, Nyujuh Bulan, Tusing Taén Mujur, Yén Bénjang Tiang dados Présidén, Rindu, Tresna Boya ja Arta, Arta Boya ja Tresna.

       Satua cutet ring cakepané puniki nyaritayang indik makudang-kudang téma, saking téma kehidupan sosial, ipian, lan rasa tresna majeng ring sang sané dados bungan keneh.

Niki wantah punggelan tigang carita sané kaambil saking cakepané punika.

Ditu di sisin tukadé, dapetanga I Gedén ngeling padidiana. Krana ada anak ramé ané maakin déwékne I Gedén bangun tur nyemak kayu.

“Apa kaalih mai, magedi cai manusa-manusa buduh!”

“Mai ajaka ngalih ubad.”

“Cang sing sakit, cang sing buduh. Cai ajak makejang ané buduh. Jani cai makejang lakar ajak cang ka RSJ Bangli. Ha...ha...ha...ha!,” kakéto munyiné I Gedén sahasa.....

(Buduh, kaca kaping 60-61)

Uli cerik, kanti tua Pekak Nandia ngalih bagia. Uli majudi kanti ngadep warisan ipun ngalih bagia, nanging nénten taén panggihin ipun. Dija kadén bagiané punika. Satuane di jalané dugas kantun teruna ngorahang idup ngalih bagia. Ngorahang bagia punika kapanggih yéning sampun sida.......

(Ngalih Bagia, kaca kaping 67)

Tiang mawasta Wayan Kalér, sawiréh tiang dugas mara lekad koné tiang madulu kaja. Reraman tiangé tuah dados buruh. Mémén tiangé maburuh ngajang nyuh, lan bapan tiangé maburuh numbég di pisaga. Ulian nika tiang kapah urusanga tekén reramané. Tiang malajahang déwék ngurus awak padidi. Kanggéang mandiri, yadiastun durung bisa mandiri. Tiang ngerti tekén kawéntenan reraman tiangé. Tiang nénten ja gedeg tekén ipun. Tiang uning reraman tiangé kantun ngaruruh jinah anggén déwék tiangé sakaluwarga nyalanin urip.

Reraman tiangé malempag ngalih gaé sabilang wai mangda sida ngisinin basang sané setata nagih isinin lan sida nyekolahang tiang. Mangda sida tiang polih ilmu ring sekolah. Mangda tiang dados anak sané duweg lan suksés buin mani puan. Mangda tiang nénten.....

(Yén Bénjang Tiang dados Présidén, kaca kaping 112)