Hélikopter

Helikopter

Murdan Cakepan    : Hélikopter
Pangawi                  : Nyoman Manda
Kawedar Antuk      : Pondok Tebawutu Gianyar
Warsa                      : 2004
Tebel                       : 24 kaca


Buku kakawian Nyoman Manda puniki madaging satua cutet sané kasurat warsa 1994 kantos 1996. Ring cakepané puniki madaging tigang satua cutet inggih punika “Hélikopter”, “Guru Madé”, lan “Angin Ngesir di Batan Binginé.”
Satua cutet “Hélikopter” nyeritayang indik éksploitasi alam sangkaning panglimbak pariwisata ring Bali. Abing, tukad, teba, lan pemandangan sané asri kerampag lan kebangunin hotél, lapangan golf, miwah sané lianan. Carita ring “Hélikopter” puniki kadasarin antuk wéntené perusahaan swasta sané ngruruh tanah penyatusan héktar jagi kaanggén ngwangun hotél lan lapangan golf. Pro lan kontra punika lantas kedadosang daging carita, lan kaceritayang invéstoré memaksa makarya lapangan golf, lan hotél sané ngawinang kaasrian jagaté ilang. Ring silih sinunggil désa ring Payangan masyarakaté protés ring invéstoré sané kadukung olih penguasa, ngawinang wénten persetujuan sané dagingné wantah netepang tanah désa pinaka tanah adat. Indiké punika ngawinang sabilang wai hélikopteré setata makeber éndép jagi ngrereh tanah.
Satua cutet sané kaping kalih wantah “Guru Madé”. Satua cutet puniki ngamolihang Juara I penulisan cerpén rikala Pésta Kesenian Bali. “Guru Madé” nyeritayang indik guru sané gajihné nénten ja cukup anggén biaya idup sawai-wai. Yadiastun pianakné sampun wénten sané lulus, sakéwanten nénten polih pakaryan duaning wénten KKN. Satua cutet puniki kaangkat saking pajalan idup sang pangawi sané dados guru ring SMU lan pinaka catatan harian dados pendidik.

Satua cutet sané kaping tiga mamurda “Angin Ngesir di Batan Binginé” wantah carita perjungan ring Gianyar warsa 1946 sané nyeritayang indik perjuangan Wayan Dipta ipah saking sang pangawi rikala ngalawan penjajah Welanda kantos séda katémbak ring sétra Sukawati.

NB: Reriptan puniki kabasabaliang olih Putu Supartika saking Blog Pondok Tebawutu

No comments